د سټنډرډ ملي ادارې د کابل ښار په بازارونو کې د سیخ ګول د پلورلو د مرکزونو او هټیو د پلټنې بهیر پیل کړ
۱۴۴۴ هـ ق ۹ جمادی الثاني
د افغانستان د سټنډرډ ملي ادارې د کابل ښار په بازارونو کې د سیخانو د پلورلو د مرکزونو او هټیو د پلټنې بهیر پیل کړی دی. اوس مهال دغه پروسه د افغانستان د اوسپنې د استخراج د فابریکو له اتحادیې سره په همغږي د سټنډرډ ملي ادارې د مطابقت ارزونې ریاست د تخنیکي ټیم له خوا په عملي ډول د ښار په ځینو برخو کې په جدي توګه پرمخ وړل کیږي.
دا په داسې حال کې ده چې دغه بهير تر دې مخکې په ټول هېواد کې د سيخ ګول او د اوسپنې د وسايلو د توليد د فابريکو په لومړي پړاو کې په برياليتوب سره بشپړ شوى او په دوامدار ډول دوام لري. د سټنډرډ ملي ادارې رهبري په هېواد کې د اوسپنې له ټولو پلورونکو او عرضه کوونکو څخه غوښتنه کوي چې د بې کیفیته اوسپنې له پلورلو ډډه وکړي، که نه نو له قانوني چلند سره به مخ شي.
د افغانستان د سټنډرډ ملي اداره د شفافیت د اصولو په پام کې نیولو سره او د خلکو غوښتنو ته د ځواب ویلو په خاطر، په هیواد کې د کیفیت د تضمین یوازینۍ ادارې په توګه، په هیواد کې د ساختماني ډګر د معیاري کولو لپاره پرله پسې او ساعتونه هڅې کوي او پراخ پروګرامونه یې پلي کړي دي.
