د سټنډرډ عالي شورا غونډه ترسره شوه.

دوشنبه

۲۸/تله/۱۳۹۹

د جمهوري ریاست د دویم مرستیال او د سټنډرډ عالي شورا رییس استاد سرور دانش په مشرۍ د سټنډرډ عالي شورا غونډه ترسره شوه. په دغه غونډه کې د سټنډرډ ملي ادارې لوی رییس عزیز احمدزي، د دې ادارې مرستیالانو او د شورا غړو ګډون درلود.

ښاغلي احمدزي د غونډې په پیل کې د شورا غړو ته د ادارې د فعالیتونو په تړاو هر اړخیز راپور وړاندې کړ. په معیاري ډول د پمپ سټېشنونو د رغولو تګلاره، ۲۷ تازه سټنډرډونه، د سمنټو د بیې ټاکل او د معادلت د میکانیزم تګلاره د بحث محور و. هغه دغه راز پر سوداګرو غږ وکړ چې د بې کیفیته توکو له واردولو څخه ډډه وکړي.

د دې ترڅنګ ښاغلي دانش له دغې ادارې څخه هر اړخیز ملاتړ اعلان کړ او له نورو ادارو سره پر همغږۍ یې ټینګار وکړ. نوموړي پر نورو اړوندو ادارو غږ وکړ چې له سټنډرډ ملي ادارې سره هر اړخیرزه او متداومه همکاري ولري.

په دغه غونډه کې د سټنډرډ ملي ادارې له لوري د خوړو د خوندیتوب د مدیریت سېسټم، د طبي لګښتونو لپاره ترزیقي وسایلو، کانونو، د سون، نفتي او ودانیزو توکو، چاپېریال ساتنې، لمریزې برښنا او ماین پاکۍ په برخو کې د ۲۷ وړاندې شوو سټنډرډونو په تړاو هم بحث وشو.

د ناستې په اوږدو کې پر یادو سټنډرډونو تر بحث ورورسته د پرېکړې له مخې دغه سټنډرډونه په پرنسیب کې تایید شول.