د سټنډرډ ملي ادارې د الکترو تخنیک او مخابراتو د سټنډرډونو د جوړونې تخنیکي غونډه ترسره شوه
غونډه د دې ادارې د ملي سټنډرډونو او ودانیزو کوډونو د جوړونې او رواجولو رئیس مولوي محمد حنیف، د الکترو تخنیک او مخابراتو د امریت مسئولینو، د اړوندو دولتي ادارو او خصوصي سکتور استازو په ګډون د سټنډرډ ملي ادارې د تخنیکي غونډه په تالار کې ترسره شوه.
یاده غونډه د قرانکریم د مبارکو آیتونو په تلاوت سره پیل شوه.
په پیل کې، مولوي محمد حنیف د یادې کمېټې د ارزښت او نورو اړوندو موضوعاتو په اړه هر اړخیزې خبرې وکړې. ورپسې، د سټنډرډ ملي ادارې د اړوندو برخو مسئولینو د تخنیکي کمېټو د فعالیتونو، کاري طرزالعملونو او همدارنګه د منظور شوو سټنډرډونو په اړه یو هر اړخیزه پریزنټیشن وړاندې کړه.
د غونډې په ترڅ کې د غړو د مشورو او ارزونو وروسته د کابل پوهنتون د انجینرۍ پوهنځي د بریښنا څانګې استاد او سرپرست پوهنیار میلاد عبدالله، ددې کمېټې د نوي رئیس په توګه وټاکل شو.
ددې کمېټې رئیس د دندو د لا ښه ترسره کولو په اړه لازمې خبرې وکړې او نورو غړو د کمېټې د فعالیتونو د ښه والي په برخه کې ارزښتمن وړاندیزونه وړاندې کړل.
غونډه د کمېټې د کاري پلان او ټاکل شوو موخو د ترسره کولو په اړه د بحث او نظر تبادلې په ترڅ کې پای ته ورسېده. ددې کمېټې فعالیتونه چې د نړیوالو بنسټونو لکه IEC سره د اړیکو د نشتوالي له امله ۱۰ میاشتې درېدلي وې، اوس د یادو سازمانونو سره د اړیکو د بیا تامین له امله بېرته فعاله شوي دي. ددې کمېټې فعالیتونه په هېواد کې د الکترو تخنیک او مخابراتو د کمېټې د همکارۍ او فعالیتونو د ښه والي لپاره مهم ګام ګڼل کېږي.
