د سټنډرډ ملي اداره د سوداګری پر وړاندې د تخنیکي خنډونه لرې کولو لپاره لازم اقدامات ترسره  کړي دي

١٤٤٤ ه . ق ۱۹ ربیع الاول

د TBT د تخنیکی کمیټې غونډه د سټنډرډ ملي ادارې د مطابقت ارزونې ریاست لخوا جوړه شوه. په دې غونډه کې د سټندرد ملي ادارې عمومي رئیس الحاج ملا فیض الله تمیم، د مطابقت ارزونې رئیس مفتي فضل الرحمن منصور، د اړونده وزارتونو او ادارو چارواکو ګډون کړی وو .

دا غونډه د مختلفو وزارتونو او ادارو ترمنځ د  سټندرد ملي ادارې سره د سوداګریزو اسانتیاوو د برابرولو ، د تخنیكي مقرراتو د تطبیق او د مطابقت ارزونې د طرزونو د برابرولو په برخه كې د همغږۍ او همكارۍ په برخه كې ترسره شوه.

پدې غونډه کې، د سټنډرډ ملي ادارې لوی رئیس وویل:  دین خیر خواهي او نصیحت دی نو پر همدې اساس موږ تاسو ټول باید کوښښ وکړو د ښې همغږی په لرلو سره نورو ته خیر ورسوو. هغه زیاته کړه  د اوسنۍ ناستې هدف دا دی چې د TBT سیسټم قوي کړي، خلکو ته ګټه ورسوي او ملت ته ریښتیني خدمات وړاندې کړي.

په همدې ډول د سټنډرډ ملي ادارې د مطابقت او ارزونې رئیس د TBT تجارت په وړاندې د تخنیکي خنډونو د تخنیکی کمیټې اهمیت په اړه هر اړخیز معلومات وړاندې کړل.

وروسته ګډونوالو د تخنیکي مقرراتو په اړه خبرې اترې وکړې او د اړونده مقرراتو او کړنلارو په پلي کولو کې یې د لا زیاتو همکاریو ژمنه وکړه.