نیمروز ته د انسا د اداري او مالي چارو مرستیال لومړنی رسمي سفر
د سټنډرډ ملي ادارې (انسا) د اداري او مالي چارو مرستیال احسان جلالزي د شنبې په ورځ (د ۱۳۹۷ کال د کب ۱۸) د یوه پلاوي په ملتیا خپل لومړنی ولایتي سفر له نیمروز ولایت څخه پیل کړ. ښاغلي جلالزي د دغه سفر په ترڅ کې له سیمه ایزو مسوولینو، د انسا سیمه ایز دفتر له کارکوونکو او نورو اړونده ادارو له استازو او یو شمېر سوداګرو سره ولیدل او اړونده چارې یې وارزولې.
ښاغلي جلالزي په یوه دوستانه فضا کې د نیمروز له والي ؟ سلطاني سره ولیدل او د سټنډرډ اړوند بېلابېلو مسایلو یې خبرې وکړې.
ورپسې، د انسا د اداري او مالي چارو مرستیال د مرکز زرنج ښار کې د دغې ادارې سیمه ایز دفتر ته معرفي شو. له لنډې پېژندنې او د موجودو اسنادو له اروزنې وروسته ښاغلي جلالزي د انسا د زرنج څانګې ته د لازمو لارښوونو په ترڅ کې وویل چې د دغې څانګې ټولې شعبې دې په جلا جلا توګه د خپلو چارو اړوند راپورونه چمتو او د انسا مرکزي دفتر ته دې وسپاري.
له هغې وروسته، ښاغلی جلالزی او ورسره مل پلاوی یې له ایران سره پر صفري کرښې بندر ته ولاړ او هلته یې د نفتي توکو د ارزونې لابراتوارونه له نږدې وکتل. نوموړي د ټسټ او ارزونې د لابراتوارونو له ارزونې وروسته یې اړونده کارکوونکو ته پر یو لړ مهمو مسایلو کې له غور او دقت د کار اخیستو لارښوونه وکړه.
د انسا د اداري او مالي چارو مرستیال د یکشنبې په ورځ د سهار په ۸ بجو او ۳۰ دقیقو د دغې ادارې سیمه ایز دفتر ته ورغی او هلته یې پر یو لړ مهمو مسایلو ځانګړې ناسته جوړه کړه. په ناسته کې، د زرنج سیمه ایز دفتر له مسوولینو او کارکوونکو سره د سټنډرډ په برخه کې پر موجودو چلنجونو خبرې وشوې او پر حل لارو او نویو پلانونو تمرکز وشو.
په پای کې ښاغلي جلالزي په نیمروز کې د نفتي توکو له سوداګرو سره رسمي ناسته وکړه او د سټنډرډ په اړه یې د هغوی ستونزې واورېدې. د ناستې په پای کې، د انسا د اداري او مالي چارو مرستیال پر دغو چلنجونو ژور بحث وکړ او ټینګار یې وکړ چې د اړونده همکارانو او ښکېلو اړخونو په مرسته به ژر تر ژره له دغو چلنجونو د تېرېدو لپاره میکانیزم جوړوي.
له دغه دوه ورځني سفر وروسته، ښاغلی جلالزی د دوشنبې په ورځ بېرته کابل ته راورسېد او د سفر جزییات یې د انسا له مشرتابه او د دغې ادارې له اړونده مسوولینو سره شریک کړل او د مثبت بدلون رامنځته کېدو په تړاو یې خپلې غوښتنې او لارښوونې شریکې کړې.
